ആലുവ:ആലുവയുടെ രാഷ്ട്രീയ മണ്ണിൽ വികസനത്തിന്റെ പുതുഗാഥകൾ രചിച്ചു കൊണ്ട് യു.ഡി.എഫ് സ്ഥാനാർത്ഥി അൻവർ സാദത്ത് നടത്തുന്ന തിരഞ്ഞെടുപ്പ് പര്യടനം ജനഹൃദയങ്ങൾ കീഴടക്കി സമാനതകളില്ലാത്ത മുന്നേറ്റമായി മാറുന്നു. കേവലമൊരു വോട്ട് അഭ്യർത്ഥനയ്ക്കപ്പുറം, പതിറ്റാണ്ടുകളായി മണ്ഡലത്തിൽ നെയ്തെടുത്ത ഹൃദയബന്ധങ്ങളുടെ ഊഷ്മളമായ പുനർവായനയായിരുന്നു ശ്രീമൂലനഗരത്തെ പര്യടനവീഥികളിൽ ദൃശ്യമായത്. പര്യടനത്തിനിടയിൽ അപ്രതീക്ഷിതമായി അൻവർ സാദത്തിനെ കണ്ടുമുട്ടിയ ഭിന്നശേഷിക്കാരിയായ അലമേലുവിന്റെ വാക്കുകൾ കണ്ടുനിന്നവരുടെ കണ്ണുനിറയിക്കുന്നതായിരുന്നു. വർഷങ്ങളോളം വാടകവീടുകളിൽ അലഞ്ഞ ആന്ധ്രാ സ്വദേശിയായ അലമേലുവിന്, അന്തരിച്ച ജനനായകൻ ഉമ്മൻ ചാണ്ടിയുടെ നിർദ്ദേശപ്രകാരം അൻവർ സാദത്ത് തന്റെ സ്വപ്നപദ്ധതിയായ ‘അമ്മക്കിളിക്കൂട്’ വഴി നിർമ്മിച്ചു നൽകിയ വീട് ഇന്ന് ആശ്വാസത്തിന്റെ കനൽക്കെടാത്ത വിളക്കാണ്. സ്ഥാനാർത്ഥിയുടെ തലയിൽ കൈവെച്ച് “നിങ്ങളേ ജയിക്കൂ” എന്ന് വിതുമ്പലോടെ പ്രാർത്ഥിച്ച അലമേലുവിന്റെ ചിത്രം കരുതലോടെ നാടിനെ നയിക്കുന്ന ഒരു ജനപ്രതിനിധിയുടെ ഏറ്റവും വലിയ അംഗീകാരമായി മാറി. മണ്ഡലം പ്രസിഡന്റ് വി.വി. സെബാസ്റ്റ്യൻ സ്വന്തം ഭൂമി ദാനമായി നൽകിയതും ഉമ്മൻ ചാണ്ടിയുടെ സാന്നിധ്യത്തിൽ അത് അലമേലുവിന് കൈമാറിയതും ആലുവയുടെ രാഷ്ട്രീയ ചരിത്രത്തിലെ സുവർണ്ണ അധ്യായമായി ഇന്നും വോട്ടർമാർ സ്മരിക്കുന്നു.
പുറയാർ അമ്പലത്തിൽ നിന്ന് പ്രാർത്ഥനാപൂർവ്വം ആരംഭിച്ച പ്രഭാത പര്യടനം തീപ്പിടുത്തം ഉണ്ടായ സെന്റ് ജോർജ് ബാലഭവനിലെ കുരുന്നുകൾക്ക് സാന്ത്വനമായി. അവിടെ കുട്ടികൾക്കും സിസ്റ്റേഴ്സിനുമൊപ്പം ലളിതമായ വിഭവങ്ങൾ പങ്കിട്ട് സമയം ചിലവഴിച്ച സ്ഥാനാർത്ഥി, താൻ അവരുടെ കുടുംബാംഗമാണെന്ന് ഒരിക്കൽ കൂടി തെളിയിച്ചു. കായികരംഗത്ത് വിസ്മയം തീർത്ത സിജി ഷോമി ടീച്ചറെ ആദരിച്ച ചടങ്ങ് നാടിന്റെ പ്രതിഭകൾക്കുള്ള കൃത്യമായ അംഗീകാരമായി. തോട്ടക്കാട്ടുക്കരയുടെ വീഥികളിലും കാഞ്ഞൂർ പഞ്ചായത്തിന്റെ കവലകളിലും ആവേശക്കടലായി മാറിയ പ്രവർത്തകർ, കത്തുന്ന വേനൽച്ചൂടിനെ പോലും നിഷ്പ്രഭമാക്കുന്ന വീര്യത്തോടെയാണ് സ്ഥാനാർത്ഥിയെ അനുഗമിച്ചത്. നെടുമ്പാശ്ശേരി എയർപോർട്ടിലും അത്താണി കാംകോയിലും തൊഴിലാളികളെ നേരിൽ കണ്ട് പിന്തുണ ഉറപ്പാക്കിയ സ്ഥാനാർത്ഥി, കീഴ്മാട് പഞ്ചായത്തിലെ പ്രധാന കേന്ദ്രങ്ങളിലും വോട്ട് അഭ്യർത്ഥിച്ചു. പഞ്ചായത്ത് പ്രസിഡന്റ് പ്രിൻസി ഡേവീസ്, ഡി.സി.സി ജനറൽ സെക്രട്ടറി പി.എൻ ഉണ്ണികൃഷ്ണൻ തുടങ്ങി പ്രമുഖ നേതാക്കളുടെ സാന്നിധ്യം പ്രചരണത്തിന് വൻ രാഷ്ട്രീയ മേൽക്കൈ നൽകി. ശ്രീമൂലനഗരം, ചെങ്ങമനാട്, കീഴ്മാട് കൺവെൻഷനുകളിലെ ജനപങ്കാളിത്തം അൻവർ സാദത്തിന്റെ വിജയമുറപ്പിക്കുന്ന സൂചനകളാണ് നൽകുന്നത്. ഇന്ന് രാവിലെ പറമ്പുശ്ശേരി കവലയിൽ നിന്ന് ബെന്നി ബഹനാൻ എം.പി. ഫ്ലാഗ് ഓഫ് ചെയ്യുന്ന വാഹന പര്യടനം ആലുവയുടെ ഗ്രാമാന്തരങ്ങളിൽ മാറ്റത്തിന്റെ ശംഖൊലി മുഴക്കുമെന്നുറപ്പാണ്.