മൂവാറ്റുപുഴ: ഗോവയിൽ നടന്ന മാസ്റ്റേഴ്സ് വേൾഡ് ആംറെസ്ലിംഗ് (പഞ്ചഗുസ്തി) ചാമ്പ്യൻഷിപ്പിൽ ഇന്ത്യയ്ക്കായി മെഡൽ വേട്ട നടത്തി കേരളത്തിന്റെ അഭിമാനമായി ദമ്പതികൾ. മൂവാറ്റുപുഴ സ്വദേശികളായ സുരേഷ് മാധവനും ഭാര്യ റീജ സുരേഷും ചേർന്ന് മൂന്ന് സ്വർണവും ഒരു വെള്ളി മെഡലും കരസ്ഥമാക്കി രാജ്യത്തിന്റെ പതാക ഉയർത്തി.
മാസ്റ്റേഴ്സ് വിഭാഗത്തിൽ 40-50 വയസ് പ്രായക്കാരുടെ മത്സരത്തിലായിരുന്നു റീജ സുരേഷിന്റെ തകർപ്പൻ പ്രകടനം. കരുത്തിന്റെയും ആത്മവിശ്വാസത്തിന്റെയും മികവിൽ രണ്ട് സ്വർണ മെഡലുകൾ സ്വന്തമാക്കി റീജ ശ്രദ്ധാകേന്ദ്രമായി. അതേസമയം സുരേഷ് മാധവൻ ഇടതുകൈ, വലതുകൈ വിഭാഗങ്ങളിലായി ഒരു സ്വർണവും ഒരു വെള്ളിയും നേടി ഇന്ത്യയുടെ മെഡൽ പട്ടികയിൽ നിർണായക നേട്ടം കുറിച്ചു.
അന്താരാഷ്ട്ര വേദിയിൽ കേരളത്തിന്റെ കരുത്ത് തെളിയിച്ച ഈ ദമ്പതികൾക്ക് കായിക ലോകത്തുനിന്നും വിവിധ ഭാഗങ്ങളിൽ നിന്നുമായി അഭിനന്ദന പ്രവാഹമാണ് ലഭിക്കുന്നത്. പ്രായം വെറും സംഖ്യ മാത്രമാണെന്നും ആത്മവിശ്വാസവും അധ്വാനവും ഉണ്ടെങ്കിൽ ലോക വേദിയിലും വിജയം കീഴടക്കാമെന്നുമുള്ള ശക്തമായ സന്ദേശമാണ് സുരേഷ്-റീജ ദമ്പതികൾ നൽകുന്നത്.