കൊച്ചി: നഗരത്തിലെ കനാലുകളുടെ ശുചീകരണ പ്രവര്‍ത്തനങ്ങള്‍ കൃത്യമായ ഇടവേളകളില്‍ നടത്തുന്നതിന് പ്രത്യേക സമയക്രമം നിശ്ചയിക്കും. ഓപ്പറേഷന്‍ ബ്രേക്ക്ത്രൂവിന്‍റെ പുരോഗതി അവലോകനം ചെയ്യുന്നതിന് ജില്ലാ കളക്ടര്‍ ജി. പ്രിയങ്കയുടെ സന്നിധ്യത്തില്‍ കൊച്ചി മേയര്‍ അഡ്വ. എം. അനില്‍ കുമാറിന്‍റെ അധ്യക്ഷതയില്‍ ചേര്‍ന്ന യോഗത്തിലാണ് തീരുമാനം.
ഓരോ കനാലുകളുടെയും സ്വഭാവം പരിഗണിച്ച് ഏതു മാസങ്ങളിലാണ് ശുചീകരിക്കേണ്ടത് എന്ന സമയക്രമം നിശ്ചയിക്കാന്‍ കോര്‍പറേഷന്‍ ഉദ്യോഗസ്ഥരെ യോഗത്തില്‍ ചുമതലപ്പെടുത്തി. സക്ഷന്‍ കം ജെറ്റിംഗ് മെഷീന്‍, സില്‍റ്റ് പുഷര്‍ തുടങ്ങിയ ആധുനിക ഉപകരണങ്ങള്‍ ഉപയോഗിച്ചുള്ള ശുചീകരണ പ്രവര്‍ത്തനങ്ങള്‍ നടത്തുന്നതിനും മുന്‍കൂട്ടി സമയക്രമം തീരുമാനിക്കും.
നിലവില്‍ അടിയന്തരമായി വെള്ളക്കെട്ട് ഉണ്ടാകുന്ന സാഹചര്യങ്ങളില്‍ ജലം പമ്പ് ചെയ്തു നീക്കാന്‍ ഉയര്‍ന്ന ശേഷിയുള്ള നാലു പുതിയ പമ്പുകള്‍ ഉള്‍പ്പെടെ ആറെണ്ണം സജ്ജമാക്കിയിട്ടുണ്ട്.
ഇവയുടെ ശാസ്ത്രീയമായ ഉപയോഗം സാധ്യമാക്കുന്നതിന് തയാറാക്കിയ സ്റ്റാന്‍ഡേര്‍ഡ് ഓപ്പറേഷന്‍ പ്രൊസീജിയറിന്‍റെ (എസ്ഒപി) കരട് യോഗത്തില്‍ അവതരിപ്പിച്ചു. അവയുടെ പ്രവര്‍ത്തനം എങ്ങനെ വേണമെന്നും നിശ്ചയിക്കാന്‍ ബന്ധപ്പെട്ട വകുപ്പുകള്‍ നേരിട്ട് സ്ഥലം പരിശോധിക്കും. തുടര്‍ന്ന് എസ്ഒപിക്ക് അന്തിമ അംഗീകാരവും നല്‍കും.
